DARHI MUNDE KI TARAAWH

*DARHI MUNDE KI TARAAWH*
⭕AAJ KA SAWAL NO.1001⭕

Ek shakhs darhi Mundata hai usne sachche dil se taubah kar li hai aur aaindah rakhne ka pakka iradah kar liya hai magar abhi ek musht darhi nahin huyi hai aur ugna ya lambi karna uske ikhtiyar me nahin hai to kya aise ke pichhe farz namaz aur taraawih makrooh hogi?

Isee tarah jo imam darhi mundana ya ek musht se pehle katana nahin chhodte aise imam ke pichhe farz namaz aur taraawih ka kya hukm hai ?

tafseelan jawab inayat kare

🔴JAWAB🔴

Faqeehul asr mufti Rasheed Ahmad ludhyani Rahmatullahi alayhi likhte hain taubah ke bawajood aise shakhs ki imamat do wajah se makrooh hai,

1.Ek yeh ke uspar abhi tak islah ka asar zahir nahin huwa hai aur yeh faisala nahin kiya ja sakta ke aaindah is kabeerah gunah se bachne ka ehtimam karega ya nahin?;

2.Dusri wajah yeh hai ke jin logon ko tauba ka ilm nahin unko yeh galat fahmi hogi aur yahee samjhenge ke fasiq namaz padha raha hai (is jahalat ke daur me darhi katane wale ki imamat jaiz hai aisi galat fahmi failne Ka bhi andesha hai)

📗(Ahsanul fatawa 3/262)

Faqeehun nafs Mufti Kifayatullah رحمت اللہ علیہ likhte hain Agar dusra is se behtar imam mil sakta hai to use imam na banaya jaye.

📔Kifayatul Mufti 3/87

Aisa imam sakht gunehgar hai uske pichhe namaz makrooh e tahreemi hai aur woh wajibul ihanat (toheen karna (dobarah padhna) wajib) hai usko imam banane me uski ta'azim-izzat hai isliye usko imam banana jaiz hee nahin hai.

📕Imdadul Muftiyyeen 1/261bahawala shami 1/276

Agar koi aisa shakhs zabardasti imam ban gaya ya trustee ne bana diya aur hatane par qudrat na ho to kisi dusri masjid me nek-salih imam talaash kare, agar na mile to jamaat na chhode balke us fasiq ke pichhe hee namaz parh le *uska azaab aur wabaal masjid ke muntazimeen -zimmedaron-trustee par hoga.*

📓Ahsanul fatawa 3/26

Usko imam banana makrooh hai albattah agar woh khud imam bankar namaz parhawe to namaz ho jayegi agarche woh sawab na mile jo muttaqee imam ke pichhe parhne se milta hai.

📘Fatawa Mahmoodiya 7/43

*Isee tarah agar sab muqtadi darhi munde ho to darhi mundane wala imam ban jaye*

📙Kifayatul Mufti 3/57

📚Masaile imamat 58 se 60 ka khulasa

✏MUFTI IMRAN ISMAIL MEMON HANFI GUFIRA LAHOO
MUDARRISE DARUL ULOOM RAMPURA SURAT GUJRAT INDIA
Roman me masail ke liye
www.aajkasawal.page.tl
gujrati, urdu, hindi, parche parhne, down lode aur share karne
deeneemalumat. net site ki visit karen.